ഗെയിൽ പൈപ്പ് ലൈൻ കുഴിയിൽ വീണ്ടും ലോറി താഴ്ന്നു

താമരശ്ശേരി: താമരശ്ശേരി -കൊയിലാണ്ടി സംസ്ഥാന പാതയിൽ പൂനൂരിന് സമീപം കേളോത്താണ് ലോറി താഴ്ന്നത്.ഗെയിൽ പൈപ്പ് ലൈന് വേണ്ടി കുഴിയെടുക്കുകയും പിന്നീട് മണ്ണിട്ട് മൂടുകയും ചെയ്ത ഭാഗത്ത് കണ്ണൂരിൽ നിന്നും വെട്ടുകല്ല് കയറ്റിവന്ന  ടിപ്പർ ലോറിയാണ് താഴ്ന്നുപോയത്.  ലോറിയിലുണ്ടായിരുന്നവർ പരിക്കേൽക്കാതെ രക്ഷപ്പെട്ടു.ഇതിന് സമീപത്ത് മുമ്പും സമാന രീതിയിൽ വാഹനം താഴ്ന്ന് പോയിരുന്നു.

ഗെയിൽ പൈപ്പ് ലൈൻ സ്ഥാപിക്കുന്നതിനായി എടുത്ത കുഴികൾ ശരിയായി മൂടാത്തത്  കാരണം താമരശ്ശേരി മുതൽ കന്ദമംഗലം വരെയും, ചുങ്കം മുതൽ  എകരൂൽ -ബാലുശ്ശേരി വരെയും  അപകടങ്ങൾ പതിവാണ്. കുഴികളിൽ വീണ് നാല് ബൈക്ക് യാത്രക്കാരുടെ ജീവൻ പൊലിഞ്ഞിട്ടുണ്ട്. ഏതാനും ദിവസം മുമ്പ് തച്ചംപൊയിലിൽ നിറയെ യാത്രക്കാരുമായി പോകുകയായിരുന്ന ബസ്സ് കുഴിയിൽ താഴ്ന്നിരുന്നു. കാരാടിയിലും, പാലക്കുറ്റിയിലും, കൊടുവള്ളിയിലുമെല്ലാം സമാന രൂപത്തിൽ നിരവധി വാഹനങ്ങളാണ് കുഴികളിൽ താഴ്ന്നത്.

പൈപ്പ് ലൈൻ കുഴികൾ ശരിയായ രൂപത്തിൽ മൂടി അപകടങ്ങൾ ഒഴിവാക്കാനുള്ള അടിയന്തിര നടപടി കൈക്കൊള്ളണമെന്ന് നാട്ടുകാർ ആവശ്യപ്പെട്ടു.