മരുതിലാവ് അംഗനവാടി റോഡിന്റെ ശോചനീയാവസ്ഥ പരിഹരിക്കണം.

 

താമരശ്ശേരി: പുതുപ്പാടി  പഞ്ചായത്തിലെ അഞ്ചാം വാർഡിൽ ഉൾപ്പെടുന്ന മരുതിലാവ് അംഗനവാടി റോഡ് സഞ്ചാരയോഗ്യമാക്കണമെന്ന് പ്രദേശവാസികൾ ആവശ്യപ്പെട്ടു. റോഡ് തകർന്ന് കിടക്കുന്നതിനാൽ ജനങ്ങൾക്ക് വലിയ പ്രയാസമാണ് സൃഷ്ടിക്കുന്നതെന്ന് നാട്ടുകാർ പറഞ്ഞു.വിവിധ ആവശ്യങ്ങൾക്കായി ആളുകൾ അംഗനവാടിയിലേക്കും താഴ് വാരത്തേക്കും എത്തിച്ചേരാൻ   ഏറെ പ്രയാസമനുഭവിക്കുകയാണ്. പത്തിലധികം കുടുംബങ്ങളാണ് പ്രദേശത്തുള്ളത്.

മുൻ പഞ്ചായത്ത് ഭരണ സമിതിയുടെയും, മെമ്പറുടെയും ശ്രമഫലമായി വാടക കെട്ടിടത്തിൽ പ്രവർത്തിച്ചുകൊണ്ടിരുന്ന മരുതിലാവ് അംഗനവാടിക്ക് 11 ലക്ഷം രൂപ വകയിരുത്തി സ്വന്തമായി ഒരു കെട്ടിടം നിർമ്മിച്ചത്.അതോടൊപ്പം വിദ്യാർത്ഥികൾക്കും പ്രദേശവാസികൾക്കും ആശ്വാസമായി 4 ലക്ഷത്തോളം രൂപ വകയിരുത്തി തൊഴിലുറപ്പ് പദ്ധതിൽ ഉൾപ്പെടുത്തി പ്രധാന റോഡിൽനിന്നും അംഗനവാടി വരെ 150 മീറ്റർ ദൂരം കോൺക്രീറ്റ് ചെയ്യുകയും ചെയ്തു. അവിടെ നിന്നും 200 മീറ്ററോളം ദൂരമാണ് തകർന്ന് കിടക്കുന്നത ഇതുകൂടി  കോൺക്രീറ്റ് ചെയ്താൽ ദുരിതത്തിന് പരിഹാരമാവും. ഇതിനു വേണ്ട അടിയന്തിര നടപടി സ്വീകരിക്കണമെന്ന് നാട്ടുകാർ പലതവണ പഞ്ചായത്ത് ഭരണസമിതിയോടും,മെമ്പറോടും ആവശ്യപ്പെട്ടെങ്കിലും നടപടിയുണ്ടായിട്ടില്ല. 

സാധാരണക്കാരായ ജനങ്ങൾ താമസിക്കുന്ന പ്രദേശത്തെ റോഡിനു താത്കാലികമായ ക്രമികരണമെങ്കിലും ചെയ്തു തരണമെന്ന് പ്രദേശവാസികൾ അഭ്യർത്ഥിച്ചപ്പോൾ കുറഞ്ഞ വീടുകൾ മാത്രമുള്ള ഭാഗത്ത്   ഫണ്ട് അനുവദിക്കാനാവില്ല എന്ന ധിക്കാരപരമായ നിലപാടാണ്  വാർഡ് മെമ്പർ സ്വീകരിച്ചെതെന്ന് പ്രദേശവാസികൾ പരാതിപ്പെട്ടു.   വാർഡിലെ വികസന പ്രവർത്തനങ്ങൾക്ക്  പക്ഷവാദം കാണിക്കുന്ന  ഇത്തരം നിലപാട് തിരുത്തണമെന്നും  ജനോപകാരപ്രദമായ  നിലപാട് സ്വീകരിക്കണമെന്നും സിപിഎം മരുതിലാവ് ബ്രാഞ്ച് കമ്മിറ്റി ആവശ്യപ്പെട്ടു.