ടോക്കൺ ലഭിച്ചവർക്ക് വാക്സിനില്ല, താമരശ്ശേരിയിൽ വാക്സിനേഷൻ താളം തെറ്റി.

താമരശ്ശേരി: താമരശ്ശേരിയിലെ വാക്സിസിനേഷൻ താളം തെറ്റി. ഗ്രാമ പഞ്ചായത്തിലെ 1, 2, 3, 4, 16, 17, 18, 19 വാർഡുകൾക്കായി ടോക്കൺ നൽകി  കോരങ്ങാട് എൽപി സ്കൂളിൽ വെച്ച് സംഘടിപ്പിച്ച ക്യാമ്പിൽ ടോക്കൺ ലഭിച്ച് വാക്സിൻ സ്വീകരിക്കാനായി എത്തിയ നിരവധി പേർക്ക് വാക്സിൻ ലഭിച്ചില്ല.എന്നാൽ മുൻകൂട്ടി ടോക്കൺ എടുക്കാത്തവർക്കും,മറ്റു വാർഡുകളിൽ നിന്നും എത്തിയ ചിലർക്കും  ഇവിടെ നിന്നും വാക്സിൻ കിട്ടുകയും ചെയ്തു.

മുൻകൂട്ടി ടോക്കൺ ലഭിച്ചവർക്ക് വാക്സിൻ കിട്ടാതിരുന്നപ്പോഴാണ് മുൻകൂട്ടി ടോക്കൺ വാങ്ങാത്തവർ വാക്സിൻ എടുത്ത് പോയത്. ആകെ 387പേർക്കാണ് ഇന്ന് വാക്സിൻ നൽകിയത്. എട്ടു വാർഡുകളിലായി 240 പേർക്ക് ഇന്നലെ തന്നെ ടോക്കൺ നൽകിയിരുന്നു, ഇതിൽപ്പെട്ടവർക്കാണ് വാക്സിൻ കിട്ടാതെ പോയത്.

പിന്നീട് കോവാക്സിൻ 50 ഓളം ഡോസ് എത്തിയെന്നറിയിച്ച് പലരേയും വിളിച്ചു വരുത്തിയും നൽകിയിരുന്നു.എന്നിട്ടും ടോക്കൺ കിട്ടിയവർ പുറത്തായി.

ടോക്കൺ നൽകിയവർ പുറത്ത് നിൽകെ തന്നെ ചിലർ തങ്ങളുടെ സ്വന്തക്കാർക്ക് ക്രമവിരുദ്ധമായി വാക്സിൻ സ്വീകരിക്കാൻ സൗകര്യം ഒരുക്കി കൊടുത്തതായും പരാതി ഉയർന്നിട്ടുണ്ട്.

താമരശ്ശേരി താലൂക്ക് ആശുപത്രിയിൽ വെച്ചും, പരപ്പൻ പൊയിലിൽ വെച്ചും വാക്സിൻ നൽകുമ്പോൾ ടോക്കണുകൾ പൂഴ്ത്തിവെച്ച് ചില ജീവനക്കാരും, മറ്റു ചിലരും ചേർന്ന് വേണ്ടപ്പെട്ടവർക്ക് വാക്സിൻ സ്വീകരിക്കാൻ സൗകര്യം ഒരുക്കി കൊടുക്കുന്നതായി നേരത്തെ തന്നെ പരാതിയുണ്ട്.