താമരശ്ശേരി: കരിപ്പൂര്‍ സ്വര്‍ണ്ണക്കവര്‍ച്ചാ കേസില്‍ ടിപ്പറുമായി വന്ന മുഖ്യപ്രതി പിടിയില്‍. താമരശ്ശേരി കുടുക്കിലംമാരം കുന്നംവള്ളി ശിഹാബ്(37) ആണ് പിടിയിലായത്. ഇയാളെ ചോദ്യം ചെയ്തപ്പോള്‍ അര്‍ജൂന്‍ ആയങ്കി വരുന്ന വാഹനത്തെ ടിപ്പര്‍ ലോറി ഉപയോഗിച്ച് ആക്രമിക്കാന്‍ താമരശ്ശേരി സംഘത്തില്‍ നിന്നും കൊട്ടേഷന്‍ കിട്ടിയത് പ്രകാരമാണ് ഇയാളും സംഘവും എത്തിയതെന്ന് മൊഴി നല്‍കി. എന്നാല്‍ വാഹനം ഹെഡ് ലൈറ്റ് ഓഫാക്കി വളരെ വേഗത്തില്‍ പോയതിനാലാണ് അപകടത്തില്‍ നിന്നും രക്ഷപ്പെട്ടത്. തുടരന്ന് ഈ വാഹനത്തെ പിന്‍തുടര്‍ന്ന് പോയ സംഘത്തില്‍ ഉള്‍പ്പെട്ട പാലക്കാട് സംഘത്തിന്റെ വാഹനം അപകടത്തില്‍ പെടുകയും 5 പേര്‍ മരിക്കുകയും ചെയ്തു. സംഘത്തില്‍ പെട്ട അബ്ദുല്‍ നാസറിനെ 5 ദിവസം മുന്‍പ് താമരശ്ശേരിയില്‍ നിന്നും പ്രത്യേക അന്വോഷണസംഘം പിടികൂടിയിരുന്നു. ഇയാളെ ചോദ്യം ചെയ്തതിനെ തുടര്‍ന്ന് ടിപ്പര്‍ ലോറി കഴിഞ്ഞ ദിവസം കൂടത്തായിയില്‍ നിന്നും ദിവസം പിടികൂടിയിരുന്നു. ശിഹാബിനെ വിശദമായി ചോദ്യം ചെയ്തതില്‍ ഇവരുടെ സംഘത്തില്‍ ഉള്‍പ്പെട്ട മുഴുവന്‍ ആളുകളേയും വാഹനങ്ങളേയും കുറിച്ച് വ്യക്തമായ സൂചന ലഭിച്ചിട്ടുണ്ടെന്ന് ഡി വെ എസ് പി അഷ്റഫ് പറഞ്ഞു. കേസില്‍ ഉള്‍പ്പെട്ട പ്രതികള്‍ക്ക് ഒളിവില്‍ കഴിയുന്നതിനും മറ്റും സഹായം ചെയ്തു വരുന്നവരേയും നിരീക്ഷിച്ചു വരികയാണ്. ഇവര്‍ക്ക് വേണ്ടിയുള്ള അന്വേഷണം ഊര്‍ജ്ജിതമാക്കിയതായും വരും ദിവസങ്ങളില്‍ കൂടുതല്‍ അറസ്റ്റ് ഉണ്ടാകുമെന്നും ഡി വൈ എസ് പി അറിയിച്ചു.
