എ.ബി.സി.ഡി. കാറ്റഗറി തിരിച്ചുള്ള അശാസ്ത്രീയ ലോക്ഡൗണ്‍ രോഗവ്യാപനം കൂട്ടുമെന്ന് വ്യാപാരികള്‍. വരും ദിവസങ്ങളില്‍ എ.ബി.സി. കാറ്റഗറിയില്‍ കടകള്‍ തുറക്കാമെന്നും ഡി കാറ്റഗറിയില്‍ കടകള്‍ തുറക്കാന്‍ പാടില്ലയെന്നുമുള്ള തുഗ്ലക് പരിഷ്‌കാരങ്ങളെയാണ് വ്യാപാരികള്‍ എതിര്‍ക്കുന്നത്. ഇതുമൂലം ഡി കാറ്റഗറിയിലുള്ള ആളുകള്‍ സമീപത്തുള്ള മറ്റ് കാറ്റഗറികളിലേക്ക് പോവുകയും അവിടെ വന്‍ തിരക്ക് അനുഭവപ്പെടുകയും രോഗവ്യാപനത്തിന് കാരണമാവുകയും ചെയ്യും. ഡി കാറ്റഗറിയിലുള്ള ആളുകള്‍ മറ്റ് സ്ഥലങ്ങളിലേക്ക് പോകുന്നതിന് തടസ്സമില്ലാത്ത സാഹചര്യത്തില്‍ ഡി കാറ്റഗറിയിൽ കടകളില്‍ മാത്രമാണ് കോവിഡെന്ന ചിന്താഗതിയും വിചിത്രമാണ്.
മലയോര മേഖലയില്‍ കൂടുതല്‍ പഞ്ചായത്തുകളും ഡി കാറ്റഗറിയിലാണ് എന്നത് സ്ഥിതി കൂടുതല്‍ വഷളാക്കും. ഒരു വിഭാഗം വ്യാപാരികളുടെ കെട്ടിക്കിടക്കുന്ന സ്റ്റോക്ക് തീരില്ല എന്നുമാത്രമല്ല കടുത്ത സാമ്പത്തിക പ്രതിസന്ധി നേരിടുന്ന വ്യാപാരികള്‍ക്ക് ഈ തീരുമാനം വന്‍ തിരിച്ചടിയുമാണ്. അതുകൊണ്ട് ഗവണ്‍മെന്റിന്റെ ഭാഗത്തുനിന്നും ഈ വിഷയത്തില്‍ അടിയന്തിര ഇടപെടലുണ്ടാകണമെന്ന് കേരള വ്യാപാരി വ്യവസായി ഏകോപന സമിതി ജില്ലാ സെക്രട്ടറി യും താമരശ്ശേരി യൂണിറ്റ് പ്രസിഡണ്ടുമായ അമീര്‍ മുഹമ്മദ് ഷാജി ആവശ്യപ്പെട്ടു.
Tags:
Latest News