‘ഞാന്‍ മരിച്ചെന്ന വ്യാജ വാര്‍ത്ത പ്രചരിപ്പിച്ച വ്യക്തിക്ക് നന്ദി’; അതുകൊണ്ട് എല്ലാവരും തന്നെ ഓര്‍ത്തുവെന്ന് ഷക്കീല

നടി ഷക്കീല മരിച്ചുവെന്ന വ്യാജ വാര്‍ത്ത സോഷ്യല്‍ മീഡിയയില്‍ പ്രചരിച്ചിരുന്നു. ഇപ്പോഴിതാ സംഭവത്തില്‍ തന്റെ പ്രതികരണം അറിയിച്ച് രംഗത്തെത്തിയിരിക്കുകയാണ് താരം. താന്‍ മരിച്ചിട്ടില്ലെന്നും ആരോഗ്യത്തോടെ ഇരിക്കുന്നുവെന്നും ഷക്കീല ട്വിറ്ററില്‍ പങ്കുവെച്ച വീഡിയോയിലൂടെ അറിയിച്ചു.

അതിന് പുറമെ വ്യാജ വാര്‍ത്ത പ്രചരിപ്പിച്ച വ്യക്തിക്കും ഷക്കീല നന്ദി അറിയിച്ചു. തന്നെ പലരും വാര്‍ത്ത കണ്ട് സത്യാവസ്ഥ അറിയാനായി വിളിച്ചിരുന്നു. ഇങ്ങനെ ഒരു വാര്‍ത്ത കാരണം എല്ലാവരും തന്നെ ഓര്‍ത്തു എന്നാണ് താരം പറയുന്നത്.

ഷക്കീലയുടെ വാക്കുകള്‍:

‘ഞാന്‍ വളരെ ആരോഗ്യവതിയും സന്തോഷവതിയുമാണ്. കേരളത്തിലെ ജനങ്ങള്‍ നല്‍കുന്ന കരുതലിന് വളരെയധികം നന്ദി. ആരോ എന്നേക്കുറിച്ച് ഒരു വ്യാജ വാര്‍ത്ത പോസ്റ്റ് ചെയ്തു. എന്തായാലും ഇങ്ങനെയൊരു വ്യാജ വാര്‍ത്ത കൊണ്ട് ഒരുകാര്യം മനസ്സിലായി. എന്നെക്കുറിച്ച് ഓര്‍ക്കാന്‍ കുറേ ആളുകള്‍ ഉണ്ടെന്ന്.

വ്യാജ വാര്‍ത്തക്ക് പിന്നാലെ നിരവധി പേരാണ് സത്യാവസ്ഥ അറിയാന്‍ എന്നെ വിളിച്ചത്. എന്തായാലും ആ വാര്‍ത്ത നല്‍കിയ വ്യക്തിക്ക് ഇപ്പോള്‍ ഞാന്‍ നന്ദി പറയുന്നു. കാരണം അയാള്‍ കാരണമാണ് നിങ്ങളെല്ലാവരും വീണ്ടും എന്നെക്കുറിച്ച് ഓര്‍ത്തത്.’