നിധി തേടി ജാർഖണ്ഡിൽ പോയ മലയാളിക്ക് നഷ്ടമായത് 8 ലക്ഷം..

താമരശ്ശേരി: നിധി തേടി ജാർഖണ്ടിൽ പോയ മലയാളിക്ക് 8 ലക്ഷം രൂപ നഷ്ടമായി.

താമരശ്ശേരി താലൂക്കിലെ താമസക്കാരനായ യുവാവിനാണ് പണം നഷ്ടമായത്.

നേരത്തെ താമരശ്ശേരിയിൽ ജോലി ചെയ്തിരുന്ന തട്ടിപ്പിന് ഇരയായ യുവാവിൻ്റെ സുഹൃത്തായ ജാർഖണ്ഡ് സ്വദേശി മുഖാന്തിരമാണ് ഇയാൾ അവിടെ എത്തിയത്.

തൻ്റെ പരിചയത്തിൽ പെട്ട ബധിരനായ ഒരാൾക്ക് നിധി കിട്ടിയിട്ടുണ്ടെന്നും, വന്ന് നേരിട്ട് പരിശോധിച്ച് കുറഞ്ഞ വിലക്ക്

കൈവശപ്പെടുത്താമെന്നും സുഹൃത്ത് ഫോൺ ചെയ്ത് വിശ്വസിപ്പിച്ചു.ഇതേ തുടർന്ന് ആദ്യം യുവാവ് സ്വന്തം ജാർഖണ്ഡിൽ എത്തുകയും നിധി നേരിട്ട് കാണുകയും, അതിൽ നിന്നും ചെറിയ രണ്ടു കഷണങ്ങൾ മുറിച്ചെടുത്ത് നാട്ടിലേക്ക് തിരിക്കുകയും ചെയ്തു.കോഴിക്കോട്ടെത്തി പരിശോധന നടത്തിയപ്പോൾ കൈയിലുള്ളത് പത്തരമാറ്റ് തങ്കമാണെന്ന് തിരിച്ചറിഞ്ഞു.

നിധിയുടെ തൂക്കം കണക്കാക്കി മാർക്കറ്റ് വില വെച്ച് നോക്കുമ്പോൾ യുവാവ് കണ്ട നിധിയുടെ വില ഏകദേശം രണ്ടു കോടിക്കടുത്ത് വരും, എന്നാൽ കേവലം 8 ലക്ഷം നൽകിയാൽ നിധി കൈമാറാൻ ഉടമ തയ്യാറായിരുന്നു.

അങ്ങിനെയാണ് നാട്ടിൽ നിന്നും പലരോടായി തുക കടം വാങ്ങി യുവാവ് വീണ്ടും ജാർഖണ്ഡിലേക്ക് വണ്ടി കയറിയത്. നിധി കൊണ്ടുവരുമ്പോൾ വഴിയിൽ സംശയങ്ങളും, തടസ്സങ്ങളും ഇല്ലാതിരിക്കാൻ തൻ്റെ സഹോദരിയേയും അദ്ദേഹം കൂടെ കൂട്ടി.

ജാർഖണ്ഡിലെത്തി തുക കൈമാറി നിധിയുമായി നാട്ടിൽ തിരിച്ചെത്തിയ ശേഷം വിൽപ്പനക്കായി കൊണ്ടുപോയപ്പോഴാണ് ചതിയിൽപ്പെട്ട കാര്യം യുവാവ് അറിയുന്നത്. ഇരുമ്പിന് മുകളിൽ കനത്തിൽ തങ്കം പൂശിയ വസ്തുവാണ് നിധി എന്ന രൂപത്തിൽ യുവാവിന് കൈമാറിയത്.

സമാനമായ രൂപത്തിൽ നിരവധി പേരെ തട്ടിപ്പിന് ഇരയാക്കിയ സംഘമാണ് പിന്നിലെന്നാണ് സംശയം.

മുന്നും, പിന്നും നോക്കാതെയും, മറ്റാരോടും വിവരം പറയാതെയും എളുപ്പത്തിൽ കോടീശരനാകാമെന്ന മോഹത്തിൽ ഇറങ്ങി പുറപ്പെട്ടത് കാരണമാണ് ചതിക്കുഴിയിൽ വീണത്.

ഏതെങ്കിലും രൂപത്തിൽ പണം തിരികെ മേടിക്കാൻ സാധിക്കുമോയെന്ന വഴിതേടി അലയുകയാണ് യുവാവ്.