ദേശീയപതാകയെ അപമാനിച്ചെന്ന പരാതിയില്‍ സംസ്ഥാന ബിജെപി അധ്യക്ഷന്‍ കെ സുരേന്ദ്രനെതിരെ പൊലീസ് കേസെടുത്തു. തിരുവനന്തപുരം മ്യൂസിയം പൊലീസാണ് കേസെടുത്തത്. സിപിഐഎം പാളയം ഏരിയാ കമ്മറ്റിയംഗം ആര്‍ പ്രദീപിന്റെ പരാതിയിലാണ് കേസ് രജിസ്റ്റര്‍ ചെയ്തിരിക്കുന്നത്. രാജ്യത്തിന്റെ യശസ് കളങ്കപ്പെടുത്തുന്നത് തടയുന്ന 1971ലെ വകുപ്പ് പ്രകാരമാണ് കേസ്. മൂന്ന് വര്‍ഷം വരെ തടവോ പിഴയോ ആണ് ഈ വകുപ്പ് പ്രകാരം ലഭിക്കാവുന്ന ശിക്ഷ.
ഇന്ന് രാവിലെ ബിജെപി സംസ്ഥാന കമ്മിറ്റി ഓഫീസില്‍ ദേശീയപതാക തലകീഴായി ഉയർത്തിയ സംഭവത്തിലാണ് നടപടി. കെ സുരേന്ദ്രന്‍ ആദ്യം പതാക ഉയര്‍ത്തിയത് തലതിരിച്ചായിരുന്നു. ആദ്യ രണ്ട് തവണയും പച്ചനിറമാണ് മുകളില്‍ വരുന്ന രീതിയിലായിരുന്നു പതാക ഉയർത്തിയത്. ഓരോ പ്രാവശ്യവും പകുതിയോളം ഉയര്‍ത്തിയ ശേഷം അബദ്ധം മനസിലാക്കി തിരിച്ചിറക്കേണ്ടിയും വന്നു. ഒടുവില്‍ തിരുത്തിയെങ്കിലും വീഡിയോയും ഫോട്ടോയും സാമൂഹിക മാധ്യമങ്ങളിലൂടെ പ്രചരിച്ചതോടെ സംഭവം വിവാദമാവുകയായിരുന്നു.
അതേസമയം, പതാക ഉയര്‍ത്തിയപ്പോള്‍ കയര്‍ കുരുങ്ങിയതാണെന്നും അതുകൊണ്ട് സംഭവിച്ച പിഴവാണെന്നുമാണ് ബിജെപി വിശദീകരണം. വിവാദങ്ങള്‍ക്ക് പിന്നാലെ ഔദ്യോഗിക പേജുകളിലെ പതാക ഉയർത്തലിന്റെ വീഡിയോ എഡിറ്റുചെയ്യുകയുമുണ്ടായി.
ഇതിനിടെ മൊബൈല്‍ ഫോണില്‍ നോക്കി ജനഗണമന ആലപിച്ച് വി മുരളീധരനും വിവാദത്തില്‍പ്പെട്ടു. അറ്റന്‍ഷനില്‍ നിന്ന് ദേശീയഗാനം ആലപിക്കേണ്ടതിന് പകരമാണ് മൊബൈല്‍ ഫോണില്‍ നോക്കി ജനഗണമന പാടി മന്ത്രി വിവാദത്തിലായത്.
Tags:
Latest News