കരുണയുള്ളവരുടെ കനിവ് തേടി നിർദ്ധനയായ വൃദ്ധ.

താമരശ്ശേരി: കരുണയുള്ള ആരെങ്കിലും സഹായത്തിന് എത്തുമെന്ന് പ്രതീക്ഷിച്ച് നിർദ്ധനയായ വൃദ്ധ. പുതുപ്പാടി പഞ്ചായത്തിലെ പെരുമ്പള്ളി പുല്ലാഞ്ഞിമേടിന് സമീപം വനഭൂമിയിൽ താമസിക്കുന്ന മഹേശ്വരിയമ്മയാണ് സുമനസ്സുകളുടെ സഹായം തേടുന്നത്.40 വർഷം മുമ്പ് തമഴ് നാട്ടിൽ നിന്നും കേരളത്തിലെത്തിയ ഇവർ 6 വർഷത്തിലധികമായി പ്ലാസ്റ്റിക് ഷീറ്റ് വലിച്ചുകെട്ടിയ ഷെഡിലാണ് അന്തിയുറങ്ങുന്നത്.

മഹേശ്വരി അമ്മക്ക് രണ്ടു മക്കളാണ് ഉള്ളത്, ഒരു മകനും, ഒരു മകളും. മകൻ വിവാഹം കഴിച്ച് മറ്റൊരിടത്താണ് താമസം. ഏഴു വർഷം മുമ്പ് മകൾ മരണപ്പെട്ടു, മകളെ ഉപേക്ഷിച്ച് ഭർത്താവ് നേരത്തെ തന്നെ നാടുവിട്ടിരുന്നു. 18 ഉം, 16ഉം വയസ്സ് പ്രായമുള്ള രണ്ട് ആൺകുട്ടികളെ വളർത്തുന്നതും പഠിപ്പിക്കുന്നതും മഹേശ്വരിയമ്മയാണ്.കൂലിപ്പണിയെടുത്തും, വീട്ടിൽ വെച്ച് സോപ്പ്, പപ്പടം, തുടങ്ങി അത്യാവശ്യ സാധനങ്ങൾ വാങ്ങി ബക്കറ്റിൽ സൂക്ഷിച്ച് വിൽപ്പന നടത്തിയുമാണ് ചിലവിന് വക കണ്ടെത്തുന്നത്.

സ്വന്തമായി 8 സെൻ്റ് സ്ഥലമുണ്ടെങ്കിലും ഒരു വീടിനായി പഞ്ചായത്തിൽ നിരവധി തവണ അപേക്ഷിച്ചു, ശരിയാക്കി തരാം എന്ന മറുപടിയല്ലാതെ ഇതു വരെ വീട് കിട്ടിയിട്ടില്ല.

പ്ലാസ്റ്റിക് ഷീറ്റുകൾ കൊണ്ട് മറച്ചും മേൽക്കൂര തീർത്തുമുള്ള കൂരക്കുള്ളിലാണ് വൃദ്ധയും രണ്ട് പേരമക്കളും കഴിയുന്നത്,

വീട് കിട്ടിയില്ലെങ്കിലും ദൈനംദിന ചിലവിന് വക കണ്ടെത്താൻ ഒരു പെട്ടികടയെങ്കിലും ആരെങ്കിലും നിർമ്മിച്ചു തന്നാൽ വലിയ ഉപകാരമാകുമായിരുന്നെന്ന് മഹേശ്വരിയമ്മ കണ്ണീരോടെ പറഞ്ഞു.

കരുണ വറ്റാത്ത ഹൃദയമുള്ള ആരെങ്കിലും ഇവരുടെ കണ്ണീരു തുടക്കാൻ മൂന്നോട്ട് വരുമെന്ന് പ്രതീക്ഷിക്കുന്നു....