പുതുപ്പാടി: വയനാട് ചുരം സംരക്ഷിക്കുന്നതിനാവശ്യമായ നടപടികൾക്ക് പ്രാധാന്യം നൽകുമെന്ന് അഡ്വ.ടി.സിദ്ദിഖ്.എം.എൽ.എ. , എം.ഇ.എസ് യൂത്ത് വിംഗ് കോഴിക്കോട് ജില്ലാ കമ്മറ്റിയുടെ സന്നദ്ധ സേനയായ യൂത്ത് ബ്രിഗേഡിന്റെ നേതൃത്വത്തിൽ എഴുപത്തി അഞ്ചാമത് സ്വാതന്ത്ര്യദിനാഘോഷത്തിന്റെ ഭാഗമായി വയനാട് ചുരം വ്യൂ പോയിൻ്റ് ശുചീകരണ പരിപാടിയുടെ ഉദ്ഘാടനം നിർവ്വഹിക്കുകയായിരുന്നു അദ്ദേഹം. ദിനംപ്രതി ഒട്ടനവധി യാത്രക്കാരും സന്ദർശകരും എത്തിച്ചേരുന്ന ചുരം വ്യൂ പോയിൻ്റും പരിസരവും ശുചീകരിക്കുന്നതിന് നേതൃത്വം നൽകിയ എം.ഇ.എസ് യൂത്ത് വിംഗിൻ്റെ പ്രവർത്തനം പ്രശംസനീയമാണെന്നും അദ്ദേഹം അഭിപ്രായപ്പെട്ടു. പുതുപ്പാടി ഗ്രാമപഞ്ചായത്ത് പ്രതിനിധികളും വയനാട് ചുരം സംരക്ഷണ സമിതിയും ശുചീകരണത്തിൽ പങ്കാളികളായി. എം.ഇ.എസ് യൂത്ത് വിംഗ് ജില്ലാ പ്രസിഡൻ്റ് ആർ.കെ ഷാഫി അദ്ധ്യക്ഷത വഹിച്ചു. ഗ്രാമ പഞ്ചായത്ത് പ്രസിഡൻ്റ് ആയിശകുട്ടി സുൽത്താൻ മുഖ്യാഥിതിയായിരുന്നു. ഗ്രാമ പഞ്ചായത്ത് വൈസ് പ്രസിഡൻ്റ് ഷംസീർ പോത്താറ്റിൽ , സ്റ്റാൻഡിംഗ് കമ്മറ്റി ചെയർപേഴ്സൺ ആയിശാബി, ചുരം സംരക്ഷണ സമിതി പ്രസിഡന്റ് മൊയ്തു മുട്ടായി, സെക്രട്ടറി സുകുമാരൻ,സി.കെ ജലീൽ, അഡ്വ.ഷമീം പക്സാൻ, സജിത്ത് ബാബു, അഫ്സൽ കള്ളം തോട്, ഷമീർ വി , അനീസ്, മൊറയാസ്, ഫസൽ കൊടുവള്ളി, ഷഫിൻ, ബാഹിർ എന്നിവർ സംസാരിച്ചു. ജില്ലാ സെക്രട്ടറി ഷാഫി പുൽപ്പാറ സ്വാഗതവും ട്രഷറർ ആഷിർ.ബി.വി നന്ദിയും പറഞ്ഞു.
Tags:
Latest News
