മദ്യത്തിന് അമിത വില ഈടാക്കുന്ന ബാറുകൾക്കെതിരെ നടപടി സ്വീകരിക്കും. എക്സൈസ് കമ്മീഷണർ.

താമരശ്ശേരി: സർക്കാർ നിശ്ചയിച്ച പരമാവതി ചില്ലറ വിൽപ്പന വിലയിൽ കൂടുതൽ തുക ഈടാക്കി ബാറുകളിൽ മദ്യം വിൽപ്പന നടത്തുന്നത് ശ്രദ്ധയിൽപ്പെട്ടിട്ടുണ്ടെന്നും, ഇവർക്കെതിരെ നടപടി സ്വീകരിക്കുമെന്നും എക്സൈസ് കമ്മീഷണർ താമരശ്ശേരി ന്യൂസ്.കോമിനോട് പറഞ്ഞു.

താമരശ്ശേരി ചുങ്കത്ത് പ്രർത്തിക്കുന്ന ഹസ്തിനപുരി ബാറിനെതിരെ കഴിഞ്ഞ മൂന്നു ദിവസങ്ങളിലായി നിരവധി പരാതികൾ ലഭിച്ചതായും, എക്സൈസിനു പുറമെ ലീഗൽ മെട്രോളിജി വിഭാഗത്തോടും പരിശോധന നടത്താൻ ആവശ്യപ്പെടുമെന്നും കമ്മീഷണർ പറഞ്ഞു.

മദ്യത്തിൻ്റെ ചില്ലറ വിൽപ്പന വില ബോർഡിൽ പ്രദർശിപ്പിക്കണമെന്നും അതിൽ കൂടുതൽ തുക ഈടാക്കാൻ യാതൊരു വിധ അനുമതിയും ബാറുകൾക്ക് നൽകിയിട്ടില്ലെന്നും അദ്ദേഹം വ്യക്തമാക്കി.

താമരശ്ശേരി ചുങ്കത്തെ ബാറിൽ MRPയേക്കാൾ 10% ത്തിൽ അധികം തുകയാണ് ഈടാക്കിയിരുന്നത്.ഉപഭോക്താക്കൾ സംഘടിതമായി പ്രതികരിച്ചപ്പോൾ ചിലർക്ക് തുക തിരികെ നൽകി. പിന്നീട് കൗണ്ടർ വഴി വിദേശ മദ്യം വിൽക്കുന്നത് നിർത്തിവെച്ച് മറ്റൊരു ഭാഗത്ത് കൂടി അമിത വില ഈടാക്കി കരിഞ്ചന്ത വിൽപ്പന നടത്തി വരികയാണ്.

സ്റ്റോക്ക് കൃത്യമാക്കുന്നതിന് പിന്നീട് ബില്ലുകൾ മുറിച്ച് ഒഴിവാക്കും. 

സംസ്ഥാനത്തിൻ്റെ വിവിധ ഭാഗങ്ങളിൽ സമാന രൂപത്തിലുള്ള വിൽപ്പന നടക്കുന്നുണ്ടെന്നും ഇതിനെതിരെ നടപടി സ്വീകരിക്കാൻ ആരംഭിച്ചിട്ടുണ്ടെന്നും ജില്ലയിലും നിയമവിരുദ്ധമായി അമിത വില ഈടാക്കുന്നവർക്കെതിരെ നടപടി സ്വീകരിക്കുമെന്നും അദ്ദേഹം പറഞ്ഞു.