ആന്ധ്രയിലെ സത്യസായ് ജില്ലയിലെ ഗൊരാണ്ട്ലയാണ് മുരളി നായികിന്‍റെ സ്വദേശം. കര്‍ഷക കുടുംബത്തില്‍ നിന്ന് സൈന്യത്തിലെത്തിയ മുരളിക്ക് നിയന്ത്രണ രേഖയ്ക്കരികിലാണ് പോസ്റ്റിങ് ലഭിച്ചിരുന്നത്. ഓപറേഷന്‍ സിന്ദൂറിന് പിന്നാലെ നിയന്ത്രണരേഖയിലെ വെടിനിര്‍ത്തല്‍ ലംഘിച്ച് പാക് സൈന്യം വെടിവയ്പ്പ് നടത്തുകയായിരുന്നു. ധീര ജവാന്‍റെ ഭൗതിക ശരീരം നാളെ ആന്ധ്രയിലെ ഗ്രാമത്തിലെത്തിക്കും.
ബുധനാഴ്ച പൂഞ്ച് സെക്ടറിലും സൈനികന് വീരമൃത്യു വരിച്ചിരുന്നു. ലാന്‍സ് നായിക് ദിനേശ് കുമാര്‍ ശര്‍മയാണ് പൂഞ്ച് സെക്ടറില്‍ വീരമൃത്യു വരിച്ചത്. നിയന്ത്രണ രേഖയില്‍ പാക്കിസ്ഥാന്‍ നടത്തിയ ഷെല്ലാക്രമണത്തില്‍ ഹരിയാനയിലെ പല്‍വാന സ്വദേശിയായ ദിനേശ് കുമാറിന് മാരകമായി പരുക്കേല്‍ക്കുകയായിരുന്നു. 12 സാധാരണക്കാരും ബുധനാഴ്ച പാക് ആക്രമണത്തില്‍ കൊല്ലപ്പെട്ടിരുന്നു.