സൈക്കിളിന്റെ നിയന്ത്രണം വിട്ടു; ഹാൻഡിൽ വയറിൽ ഇടിച്ച് മരണം; പരുക്ക് കണ്ടെത്താനായില്ല

കോഴിക്കോട്: സൈക്കിൾ അപകടത്തിൽ വൃന്ദയുടെ അപ്രതീക്ഷിത മരണത്തിൽ വിറങ്ങലിച്ചു ബന്ധുക്കളും കൂട്ടുകാരും. അപകടമുണ്ടായി പുറമേക്കു കാര്യമായ പരുക്കൊന്നുമില്ലാതിരുന്ന വൃന്ദയുടെ മരണം ഉൾക്കൊള്ളാൻ ഇപ്പോഴും ഇവർക്കായിട്ടില്ല. കൺമുന്നിലുണ്ടായ അപകടത്തിൽ കൂട്ടുകാരിയെ നഷ്ടപ്പെട്ട വേദനയിലാണ് വൃന്ദയുടെ കൂട്ടുകാരും.

ആദ്യം പ്രവേശിപ്പിച്ച ആശുപത്രിയിൽ പരുക്ക് കൃത്യമായി കണ്ടെത്താൻ കഴിഞ്ഞില്ലെന്ന പരാതിയുമുണ്ട്. മറ്റൊരു ആശുപത്രിയിൽ എത്തിച്ചു നടത്തിയ വിശദ പരിശോധനയിലാണ് ചെറുകുടലിനു പരുക്ക് കണ്ടെത്തിയത്. പരുക്കേറ്റ ഭാഗം ശസ്ത്രക്രിയ നടത്തി സ്ഥിതി നിയന്ത്രണ വിധേയമായിരുന്നു. ചികിത്സയിൽ കഴിയുന്നതിനിടെയാണ് അപ്രതീക്ഷത മരണം.

പഠനത്തിൽ മിടുക്കിയായ വൃന്ദ മികച്ച നർത്തകിയും ആയിരുന്നുവെന്ന് ആംഗ്ലോ ഇന്ത്യൻ ഗേൾസ് ഹയർസെക്കൻഡറി സ്കൂളിലെ അധ്യാപകർ ഓർക്കുന്നു. എൻസിസി കെഡറ്റ് ആയ വൃന്ദയുടെ മൃതദേഹം ഇന്നലെ സ്കൂളിൽ എത്തിച്ചപ്പോൾ അന്തിമോപചാരം അർപ്പിക്കാൻ എൻസിസി കെഡറ്റുകൾ എത്തിയിരുന്നു.