കുളിക്കുന്നതിനിടെ പുഴയിൽ വീണ സ്ത്രീ ഒഴുകിയത് മൂന്നു കിലോമീറ്റർ.

കോഴിക്കോട് : കുളിക്കുന്നതിനിടെ കാൽവഴുതി പുഴയിൽ വീണ് മൂന്ന് കിലോമീറ്ററോളം ഇരുവഞ്ഞിപ്പുഴയിൽ ഒഴുകിയെത്തിയ വയോധികയെ മുക്കം അഗ്നി രക്ഷാ സേനയും നാട്ടുകാരും ചേർന്ന് രക്ഷപ്പെടുത്തി. തൊണ്ടിമ്മൽ മരക്കാട്ടുപുറം സ്വദേശിനി താഴത്തു വീട്ടിൽ മാധവി(74) യെയാണ് മുക്കം ഫയർ ഫോഴ്സിന്റെയും നാട്ടുകാരുടെയും സമയോചിത ഇടപെടൽ മൂലം രക്ഷപ്പെടുത്തിയത്. ഇന്ന് ഉച്ചക്ക് രണ്ടര മണിയോടെ അഗസ്ത്യൻമുഴി പാലത്തിനു സമീപമാണ് സംഭവം. കുളിക്കാനായി ഇറങ്ങിയ മാധവി പുഴയിലേക്ക് വീണ് ഒഴുക്കിൽപ്പെടുകയായിരുന്നു. മൂന്ന് കിലോമീറ്ററോളം ഒഴുകിവരുമ്പോൾ അഗസ്ത്യമുഴി പാലത്തിലൂടെ വരികയായിരുന്ന ഓട്ടോഡ്രൈവർ ദിലീപിൻ്റെശ്രദ്ധയിൽപ്പെട്ടു.തുടർന്ന് ഫയർഫോഴ്‌സിൽ വിവരമറിയിച്ചു. ഉടൻ മുക്കം ഫയർ ഫോഴ്‌സ് സ്ഥലത്തെത്തി. പെട്ടെന്ന് തന്നെ അഗ്നിരക്ഷാ സേനാംഗങ്ങളും അഫ്നാസ്, സജീർ, ദിലീപ് എന്നീ നാട്ടുകാരും പുഴയിലേക്ക് ചാടി ലൈഫ്ബോയ്, ലൈഫ് ജാക്കറ്റ്, റോപ്പ് എന്നിവയുടെ സഹായത്തോടെ നീന്തിയെത്തി വയോധികയെ രക്ഷപ്പെടുത്തുകയായിരുന്നു. ഉടൻ തന്നെ മുക്കത്തെ ആശുപത്രിയിലേക്ക് എത്തിച്ചു. ഇവർക്ക് കാര്യമായ പരിക്കുകൾ ഒന്നും ഉണ്ടായിരുന്നില്ല. സ്റ്റേഷൻ ഓഫീസർ എം അബ്ദുൽ ഗഫൂർ, അസിസ്റ്റൻ്റ് സ്റ്റേഷൻ ഓഫീസർ ഗ്രേഡ് പി അബ്ദുൽ ഷുക്കൂർ, സേനാംഗംങ്ങളായ ആർ മിഥുൻ, കെ ഷനീബ്, കെ അഭിനേഷ്, എം.സുജിത്ത്, എം നിസാമുദ്ധീൻ, കെഎസ് ശരത്, വി എം. മിഥുൻ, കെഎസ്. വിജയകുമാർ, ചാക്കോ ജോസഫ് എന്നിവരാണ് രക്ഷപ്പെടുത്തിയ അഗ്നിരക്ഷാ സംഘത്തിൽ ഉണ്ടായിരുന്നത്.