"ഹരിതം പുതുപ്പാടി" മാലിന്യ നിർമാർജ്ജന പ്രവർത്തനങ്ങൾക്ക് തുടക്കമായി.

 പുതുപ്പാടി : പുതുപ്പാടി ഗ്രാമപഞ്ചായത്തിൽ അജൈവ മാലിന്യങ്ങളെ നിർമാർജ്ജനം ചെയ്യുന്നതിനുള്ള പ്രവർത്തനങ്ങളുടെ തുടക്കം അടിവാരത്ത് വെച്ച് ഗ്രാമപഞ്ചായത്ത്‌ പ്രസിഡണ്ട് അഡ്വ :  ആയിഷക്കുട്ടി സുൽത്താൻ നിർവഹിച്ചു. ഹരിത കർമ്മസേന അംഗങ്ങളെ ഉപയോഗിച്ച് പഞ്ചായത്തിലെ മുഴുവൻ വീടുകളിൽ നിന്നും, സ്ഥാപനങ്ങളിൽ നിന്നും മാലിന്യങ്ങൾ ശേഖരിച്ച് പഞ്ചായത്തിന്റെ ഉടമസ്ഥതയിലുള്ള -എം,സി, ഫ് ൽ എത്തിച്ച്, തരംതിരിച്ച് കയറ്റി വിടുന്ന പ്രവർത്തനമാണ് നടത്തുന്നത്. 38 ഹരിത കർമ്മസേന അംഗങ്ങൾ ആണ് ഇതിനു വേണ്ടിരംഗത്തുള്ളത്. നേരത്തെ ഇവർക്കുള്ള യൂണിഫോമും, ഐഡന്റിറ്റി കാർഡും, ഗ്ലൗസും വിതരണം ചെയ്തിരുന്നു. പൊതുജനങ്ങളുടെ അറിവിലേക്കായി നോട്ടീസ് വിതരണവും നേരത്തെ ചെയ്തിരുന്നു. വിവിധ തരത്തിലുള്ള അജൈവ മാലിന്യത്തിന്റെ ശേഖരണ വിവരണ കലണ്ടറും, പൊതു നിർദ്ദേശങ്ങളും,മറ്റുമടങ്ങിയ യൂസർ ഫീ കാർഡിന്റെ പ്രകാശനം ജില്ലാ പഞ്ചായത്ത്‌ മെമ്പർഅംബിക മംഗലത്ത്, ബ്ലോക്ക്‌ പഞ്ചായത്ത്‌ മെമ്പർ ബുഷ്‌റഷാഫി എന്നിവർക്ക് നൽകിയാണ് പ്രവർത്തനങ്ങൾക്ക് തുടക്കം കുറിച്ചത്. ഗ്രാമ പഞ്ചായത്ത്‌ വൈസ് പ്രസിഡണ്ട് ഷംസീർ പോത്താറ്റിൽ അധ്യക്ഷനായിരുന്നു. ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സൺ സിന്ധു ജോയി, വാർഡ് മെമ്പർ നജ്മുന്നിസ ഷെരീഫ്, പഞ്ചായത്ത്‌ സെക്രട്ടറി സുരേഷ് കുമാർ, വി.ഇ.ഒ ജലീൽ, മുൻ മെമ്പർമാരായ ഷാഫി വളഞ്ഞപാറ, മുത്തു അബ്ദുസ്സലാം, വ്യാപാരി പ്രതിനിധി ഷമീർ വളപ്പിൽ, വി. കെ ഷെരീഫ് എന്നിവർ സംബന്ധിച്ചു.