മഴ പെയ്താൽ റോഡ് പുഴയാവുന്നു, കാൽനട യാത്രക്കാരും, കച്ചവടക്കാരും ദുരിതത്തിൽ.

താമരശ്ശേരി: മഴ പെയ്യുന്നതോടെ വെള്ളം കയറി റോഡ് പുഴയാവുന്നു.ദേശീയ പാത 766 ൽ താമരശ്ശേരി പട്ടണത്തിലാണ് മഴ പെയ്താൽ റോഡിൽ പതിവായി വെള്ളം കയറി  ജനം ദുരിതമനുഭവിക്കുന്നത്. കാൽനട യാത്രക്കാരും, കച്ചവടക്കാരുമാണ് ഇതുമൂലം ഏറെ ബുദ്ധിമുട്ടുന്നത്.താമരശ്ശേരി നഗരത്തിൻ്റെ ഹൃദയഭാഗമായ ട്രഷറി, പോലിസ് സ്റ്റേഷൻ, പി ഡബ്ലു ഡി റസ്റ്റ് ഹൗസ്, ബസ് ബേഎന്നിവക്ക് മുന്നിലാണ് വെള്ളക്കെട്ട്.

വെള്ളത്തിലൂടെ വാഹനങ്ങൾ നീങ്ങുന്നതോടെ കടകളുടെ അകത്തേക്ക് വെള്ളം ഇരച്ചുകയറുന്നു. വെള്ളം തെറിക്കുന്നത് മൂലവും, കാൽമുട്ടുവരെ വെള്ളം കെട്ടിക്കിടക്കുന്നതും കാരണം മഴ പെയ്താൽ ഇതുവഴി നടന്നു പോകാനും സാധിക്കുന്നില്ല.

മഴക്കാലം ആരംഭിക്കുന്നതിനു മുമ്പ് അഴുക്ക്ചാൽ വൃത്തിയാക്കാതിരുന്നത് കാരണമാണ്  ഒഴുക്ക് തടസ്സപ്പെട്ട് റോഡിലേക്ക് വെള്ളം കയറാൻ കാരണം. ഇതു സംബന്ധിച്ച് നിരവധി തവണ അധികൃതർക്ക്ര പരാതി നൽകിയെങ്കിലും യാതൊരു പരിഹാരവും ഉണ്ടായിട്ടില്ലെന്ന് വ്യാപാരികൾ പറയുന്നു.