ചെന്നൈ: നടനും ഡിഎംഡികെ സ്ഥാപകനുമായ വിജയകാന്ത് (71) അന്തരിച്ചു. കൊവിഡ് ബാധിതനായ അദ്ദേഹം ചെന്നൈയിലെ ഒരു സ്വകാര്യ ആശുപത്രിയില് ചികിത്സയിലിരിക്കെയാണ് മരണം. ശ്വസനസംബന്ധമായ ബുദ്ധിമുട്ടുകളെ തുടര്ന്ന് വെന്റിലേറ്ററില് പ്രവേശിപ്പിച്ചിരിക്കുകയായിരുന്നു. ആശുപത്രിയില് പ്രവേശിപ്പിച്ച അദ്ദേഹത്തിന് കൊവിഡ് സ്ഥിരീകരിച്ച വിവരം വിജയകാന്തിന്റെ രാഷ്ട്രീയ പാര്ട്ടിയായ ഡിഎംഡികെ വാര്ത്താക്കുറിപ്പിലൂടെ അറിയിച്ചിരുന്നു.
ശ്വസനസംബന്ധമായ ബുദ്ധിമുട്ടുകളെ തുടര്ന്ന് ഇക്കഴിഞ്ഞ നവംബര് 20 ന് വിജയകാന്തിനെ ആശുപത്രിയില് പ്രവേശിപ്പിച്ചിരുന്നു. ഡിസംബര് രണ്ടാം വാരമാണ് അദ്ദേഹം ആശുപത്രിയില് നിന്ന് തിരിച്ചെത്തിയത്. ചൊവ്വാഴ്ചയാണ് വിജയകാന്തിനെ ആരോഗ്യ പരിശോധനയ്ക്കായി വീണ്ടും ആശുപത്രിയില് പ്രവേശിപ്പിച്ചതായി ഡിഎംഡികെ അറിയിച്ചത്. അദ്ദേഹം ആരോഗ്യവാനാണെന്നും പരിശോധനകള്ക്ക് ശേഷം വീട്ടില് തിരിച്ചെത്തുമെന്നുമാണ് പാര്ട്ടി അറിയിച്ചിരുന്നത്.
ഇനിക്കും ഇളമൈ എന്ന സിനിമയിലൂടെ ആണ് വിജയകാന്ത് വെള്ളിത്തിരയില് എത്തുന്നത്. വില്ലനായി വേഷമിട്ട അദ്ദേഹം സട്ടം ഒരു ഇരുട്ടറൈ എന്ന സിനിമയിലൂടെ നായകനായി. ഒടുവില് ക്യാപ്റ്റന് എന്ന പേരിലും വിജയകാന്ത് സിനിമാ ലോകത്ത് അറിയപ്പട്ടു. ഹിന്ദിയിലും മലയാളത്തിലുമടക്കം വിജയകാന്ത് നായകനായ സിനിമകള് റീമേക്ക് ചെയ്യപ്പെട്ടിരുന്നു. ഹോണസ്റ്റ് രാജ്, തമിഴ് സെല്വൻ, വല്ലരശ്, ത്യാഗം, പേരരശ്, വിശ്വനാഥൻ രാമമൂര്ത്തി, സിമ്മസനം, രാജ്യം, ദേവൻ, രാമണ, തെന്നവൻ, സുദേശി,ധര്മപുരി, ശബരി, അരശങ്കം, എങ്കള് അണ്ണ തുടങ്ങി നിരവധി സിനിമകളില് അദ്ദേഹം ശ്രദ്ധേയ വേഷങ്ങള് ചെയ്തു.
ഡിഎംഡികെയുടെ സ്ഥാപകനായ വിജയകാന്ത്, 2006ലെ നിയമസഭാ തെരഞ്ഞെടുപ്പില് മത്സരിച്ചെങ്കിലും പാര്ട്ടിക്ക് ഒരു സീറ്റേ നേടാനായുള്ളൂ. 2011ല് ഡിഎംകെയുമായി സംഖ്യം ചേര്ന്നാണ് താരം തെരഞ്ഞെടുപ്പിനെ നേരിട്ടത്. വിജയകാന്ത് പിന്നീട് പ്രതിപക്ഷനേതാവാകുകയും ചെയ്തിരുന്നു.