കോഴിക്കോട്: നഗരത്തില് വയോധികയായ യാത്രക്കാരിയെ ആക്രമിച്ച് സ്വര്ണമാല കവര്ന്ന കേസില് ഓട്ടോ ഡ്രൈവര് അറസ്റ്റിലായി. കോഴിക്കോട് കൊളത്തറ സ്വദേശി ഉണ്ണികൃഷ്ണനെയാണ് പോലീസ് പിടികൂടിയത്. കഴിഞ്ഞ ബുധനാഴ്ച പുലര്ച്ചെയായിരുന്നു കേസിനാസ്പദമായ സംഭവം. മാല പൊട്ടിച്ചശേഷം ഓട്ടോ ഡ്രൈവറായ ഉണ്ണികൃഷ്ണന് യാത്രക്കാരിയെ ഓട്ടോയില്നിന്ന് തള്ളിയിട്ട് കടന്നുകളയുകയായിരുന്നു.
ബുധനാഴ്ച പുലര്ച്ചെ റെയില്വേ സ്റ്റേഷനില് ട്രെയിനിറങ്ങി കെ.എസ്.ആര്.ടി.സി. സ്റ്റാന്ഡിലേക്ക് ഓട്ടോയില് കയറിയ വയനാട് സ്വദേശിനിയായ 69-കാരിയാണ് കവര്ച്ചയ്ക്കിരയായത്. ഓട്ടോയില്നിന്നുള്ള വീഴ്ചയില് പരിക്കേറ്റ ഇവര് ഒരുമണിക്കൂറോളമാണ് വഴിയരികില് കിടന്നത്. ഇതിനിടെ ചിലരോട് സഹായം അഭ്യര്ഥിച്ചെങ്കിലും ആരും തിരിഞ്ഞുനോക്കിയില്ല. ഒടുവില് ബസില് കയറി കൂടരഞ്ഞിയിലെ സഹോദരന്റെ വീട്ടിലെത്തിയശേഷമാണ് ആശുപത്രിയില് ചികിത്സതേടിയത്.
സംഭവദിവസം പുലര്ച്ചെ അഞ്ചുമണിയോടെയാണ് 69-കാരി റെയില്വേ സ്റ്റേഷനില് ട്രെയിനിറങ്ങിയത്. തുടര്ന്ന് നാല് സ്ത്രീകള്ക്കൊപ്പം ബസ് സ്റ്റാന്ഡിലേക്ക് നടന്നുപോകാന് തീരുമാനിച്ചു. മഴ പെയ്തപ്പോള് ഒപ്പമുണ്ടായിരുന്ന സ്ത്ര്ീകള് മേലപാളയത്തെ ഹോട്ടലില് കയറി. ഇതിനിടെയാണ് അതുവഴിയെത്തിയ ഉണ്ണികൃഷ്ണന്റെ ഓട്ടോയില് 69-കാരി കയറിയത്. കെ.എസ്.ആര്.ടി.സി. സ്റ്റാന്ഡിലേക്ക് പോകാനാണ് ആവശ്യപ്പെട്ടെങ്കിലും ഇയാള് വഴിമാറി സഞ്ചരിച്ചു. വഴിമാറിയെന്ന് മനസിലായതോടെ ഓട്ടോ നിര്ത്താന് പറഞ്ഞെങ്കിലും ഡ്രൈവര് കൂട്ടാക്കിയില്ല. ഇതിനുപിന്നാലെ ആളൊഴിഞ്ഞ സ്ഥലത്തുവെച്ച് ഡ്രൈവര് യാത്രക്കാരിയുടെ മാല പൊട്ടിച്ചെടുക്കുകയും ഇവരെ ഓട്ടോയില്നിന്ന് തള്ളിയിട്ട് കടന്നുകളയുകയായിരുന്നു