മാവൂരിൽ ബസ് ജീവനക്കാർ തമ്മിലുണ്ടായ സംഘർഷത്തെ തുടർന്ന് രണ്ടു ബസ്സുകൾ മാവൂർ പോലീസ് പിടിച്ചെടുത്തു.
ഇന്നലെ മാവൂർ ബസ്റ്റാൻഡിൽ വച്ച് അരീക്കോട് ഭാഗത്തേക്ക് പോകുന്ന നവാസ്കോ, എക്സ്പ്രസ് എന്നീ ബസുകളിലെ ജീവനക്കാരാണ് ഏറ്റുമുട്ടിയത്.
ഇരു ബസുകളും പിടിച്ചെടുത്തതിനു പുറമേ ആക്രമണം നടത്തിയ അഞ്ച് ബസ് ജീവനക്കാർക്കെ തിരെയും കേസെടുത്തിട്ടുണ്ട്.
ഇന്നലെ ഉച്ചക്ക് രണ്ടേ മുക്കാലോടെയാണ് മാവൂർ ബസ് സ്റ്റാൻഡിൽബസുകൾ മുറുകെയിട്ട് ജീവനക്കാർ തമ്മിൽ ഏറ്റുമുട്ടിയത്.
സമയക്രമത്തെ ചൊല്ലിയുള്ള തർക്കമാണ് ആക്രമണത്തിൽ കലാശിച്ചത് എന്നാണ് പോലീസ് പറയുന്നത്.
എന്നാൽ ദിവസങ്ങൾക്കു മുമ്പ് ചെറുവാടിയിൽ ഇരു ബസുകളിലെയും ജീവനക്കാർ ഏറ്റുമുട്ടുകയും ഒരാൾക്ക് സാരമായി പരിക്കേൽക്കുകയും ചെയ്തിരുന്നു.
അന്നും പോലീസ് ഇവർക്കെതിരെ കേസെടുത്തെങ്കിലും ഇന്നലെ വീണ്ടും മാവൂരിൽ വെച്ച് ഏറ്റുമുട്ടുകയായിരുന്നു.
സമയക്രമത്തിലെ കൃത്യത ഉറപ്പുവരുത്താൻ മാവൂർ ലൈനിൽ ബസ് ഓണേഴ്സിന്റെ നേതൃത്വത്തിൽ
വിവിധ സ്ഥലങ്ങളിലായി ഓരോ ജീവനക്കാരെ വീതം നിയമിച്ചിട്ടുണ്ട്.
എന്നാൽ ഇതൊന്നും തന്നെ സമയത്തെ ചൊല്ലിയുള്ള ജീവനക്കാരുടെ ഏറ്റുമുട്ടലിന് പരിഹാരം ഉണ്ടാക്കാൻ പര്യാപ്തമായിട്ടില്ല.